नाशिक : प्रतिनिधी
परब्रह्म परमेश्वर सर्वज्ञ श्री चक्रधर स्वामी यांचा अवतार दिन व धर्मवार्ता सोहळा रविवारी (दि. १३ ) श्रीक्षेत्र आडगाव (जि. नाशिक) येथील भगवान श्री चक्रधर स्वामी चरणांकित स्थानावर अतिशय भक्तिमय आणि उत्साही वातावरणात पार पडला. याप्रसंगी नाशिक जिल्ह्यासह विविध भागांतून आलेले संत-महंत, उपदेशी बांधव आणि ग्रामस्थ मोठ्या संख्येने उपस्थित होते.
कार्यक्रमाची सुरुवात पहाटे ५ वाजता आरतीने झाली. त्यानंतर पहाटे ५.२० ते ६ या वेळेत स्थानास व श्री मूर्तीस मंगलस्नान घालण्यात आले. सकाळी ९ ते १० या वेळेत ध्वजारोहण आणि दीपप्रज्वलन सोहळा पार पडला. सकाळी १० ते दुपारी १२ या वेळेत भाविकांच्या उपस्थितीत धर्मसभा पार पडली, ज्यामध्ये नाशिक जिल्ह्यातील मान्यवर संत-महंतांची प्रमुख उपस्थिती व निरूपण लाभले. दुपारी १२ वाजता भगवान श्री चक्रधर स्वामी जन्मोत्सव सोहळा, महाआरती व उपहार विधी संपन्न झाला, तर दुपारी १ वाजेपासून उपस्थित सर्व भाविकांसाठी महाप्रसादाचे आयोजन करण्यात आले होते.
कार्यक्रमाचे सूत्रसंचालन प्रा. बाळकृष्ण अंजनगावकर (नाशिकरोड) यांनी केले. या सोहळ्याला माजी आमदार बाळासाहेब सानप, माजी सभापती गणेश गीते, आमदार राहुल ढिकले , आमदार गोकुळ गीते, महापौर हिमगौरी आहेर, उपमहापौर विलास शिंदे, स्थायी समिती सभापती मच्छिंद्र सानप, ना. रोड देवळाली व्यापारी बँकेचे चेअरमन दत्ता गायकवाड, माजी नगरसेवक ॲड. नामदेव शिंदे, ऋद्धेश निमसे, नगरसेविका ऐश्वर्या जेजुरकर, इंदुबाई खताळे, ॲड. जे. टी. शिंदे, सुनिता भोजने, नगरसेवक विशाल संगमनेरे, शितल माळोदे तसेच महानुभाव अखिल विश्व भोपे समाज अध्यक्ष ज्योतिषाचार्य प्रभाकर आप्पा भोजने आदी प्रमुख मान्यवरांनी उपस्थित राहून लावून दर्शन घेतले.
या सोहळ्याचे आयोजन प्रणित सानप व परिवार तसेच निमंत्रक भास्कर महानुभाव, गोपाळ महानुभाव, पंकज महानुभाव, मयुर महानुभाव आणि आडगाव पंचक्रोशीतील समस्त ग्रामस्थ मंडळाच्या वतीने करण्यात आले होते.
—
