नाशिक : प्रतिनिधी
अश्विननगर येथील युडब्ल्यूसीईसीमध्ये प्री – स्कूलच्या चिमुकल्यांनी जागतिक योग दिन उत्साहात साजरा केला. कार्यक्रमाची सुरुवात रंगीत पॉवरपॉइंट सादरीकरणाद्वारे योग दिनाचे महत्त्व समजावून सांगण्याने झाली. शिक्षकांच्या मार्गदर्शनाखाली चिमुकल्या विद्यार्थ्यांनी विविध योगासने उत्साह आणि एकाग्रतेने केली.
या विशेष उपक्रमात निरोगी आहाराच्या सवयींबाबतही मुलांना मार्गदर्शन करण्यात आले. मुलांनी स्वतः भाजीपाला आणि फळांचे सॅलड तयार करून आरोग्यदायी आहाराचे महत्त्व प्रत्यक्ष अनुभवले. या उपक्रमाद्वारे शरीर आणि मन या दोन्हींच्या सर्वांगीण आरोग्याचा संदेश देत आंतरराष्ट्रीय योग दिन उत्साहात साजरा केला.
लहान वयातील मुलांना योगाची ओळख करून देणे हे केवळ शरीरापुरती मर्यादित नसते. ३ ते ५ वर्षे वयोगटातील मुलांमध्ये शरीराची जाणीव, संतुलन आणि भावनिक नियंत्रण यांचा वेगाने विकास होत असतो.
सोप्या योगासनांमुळे मुलांची स्थूल हालचाल कौशल्ये (ग्रॉस मोटर स्किल्स) विकसित होतात, शरीराचे मुख्य स्नायू बळकट होतात आणि एकाग्रता वाढते, ज्याचा शालेय शिक्षणातही सकारात्मक परिणाम दिसून येतो. तसेच योगामुळे मुलांना स्वतःला शांत ठेवण्याची कला शिकता येते. दीर्घ श्वसन आणि काही क्षणांची शांतता त्यांना भावनिक तणावाच्या प्रसंगी स्वतःला सावरायला मदत करते.
—
