नाशिक : प्रतिनिधी
सेंट लॉरेन्स हायस्कूल व ज्युनिअर कॉलेजमध्ये इयत्ता दुसरीच्या विद्यार्थ्यांनी कला तासादरम्यान टाकाऊ कागदापासून कागदी पिशवी तयार करा, या उपक्रमात उत्साहाने सहभाग घेतला. जुन्या वर्तमानपत्रांचा व टाकाऊ कागदाचा उपयोग करून विद्यार्थ्यांनी सुंदर कागदी पिशव्या तयार केल्या. या उपक्रमातून विद्यार्थ्यांना (कमी वापर, पुनर्वापर आणि पुनर्निर्मिती) या संकल्पनांचे महत्त्व प्रत्यक्ष अनुभवातून समजले.
विद्यार्थ्यांनी रंग, चित्रे आणि आकर्षक सजावटीच्या माध्यमातून आपल्या कागदी पिशव्यांना सुंदर स्वरूप दिले. प्रत्येक विद्यार्थ्याची पिशवी वेगळेपण आणि सर्जनशीलतेचा उत्तम नमुना ठरली. या उपक्रमामुळे विद्यार्थ्यांमध्ये पर्यावरण संवर्धनाची जाणीव निर्माण झाली, तसेच प्लास्टिकचा वापर कमी करून पर्यावरणपूरक सवयी अंगीकारण्याची प्रेरणा मिळाली.
या कृतीतून विद्यार्थ्यांच्या सर्जनशीलतेला वाव मिळाला, सूक्ष्म हालचालींची कौशल्ये विकसित झाली आणि स्वच्छ, हरित व शाश्वत पर्यावरणाच्या निर्मितीसाठी प्रत्येकाने आपले योगदान द्यावे हा महत्त्वपूर्ण संदेश प्रभावीपणे पोहोचला.
—
