नाशिक : प्रतिनिधी
येथील सेंट लॉरेन्स हायस्कूल आणि ज्युनिअर कॉलेजमध्ये प्राथमिक विभागाचा पदग्रहण समारंभ उत्साहात झाला. या समारंभातून विद्यार्थ्यांनी नेतृत्वाची जबाबदारी स्वीकारत आपल्या नेतृत्वगुणांची पहिली पायरी गाठली.
नवनिर्वाचित विद्यार्थी परिषद सदस्यांनी शिस्तबद्ध पद्धतीने मंचावर प्रवेश केला. त्यांना मानचिन्हे प्रदान करण्यात आली. त्यानंतर त्यांनी प्रामाणिकपणा, समर्पण आणि संघभावना जपण्याची शपथ घेतली.
विद्यार्थ्यांनी परिषद सदस्यांच्या योग्य निर्णयांचा आदर करावा; मात्र त्याचबरोबर स्वतःच्या विवेकबुद्धीचाही वापर करावा. उदाहरणार्थ, शिस्त राखण्यासाठी रांगेत चालण्यासारख्या योग्य सूचना पाळल्या पाहिजेत. परंतु एखाद्या वेळी परिषद सदस्य आपल्या अधिकाराचा गैरवापर करत असतील, तर विद्यार्थ्यांनी विचारपूर्वक निर्णय घेऊन शिक्षकांना याबाबत माहिती द्यावी.
नेत्यांचे प्रत्येक म्हणणे डोळे झाकून स्वीकारण्याऐवजी, योग्य-अयोग्याचा विचार करून समजूतदारपणे वागणे आवश्यक आहे, हा महत्त्वपूर्ण संदेश विद्यार्थ्यांना देण्यात आला.
—
