नाशिक : प्रतिनिधी
आजच्या सोशल मीडियावरील तरुणांनी जागतिक स्तरावरील यशस्वी असलेल्या राजकीय, व्यावसायिक व्यक्तिंचा सखोल अभ्यास करायला हवा. त्यासाठी विविध ग्रंथांचे वाचनही हवे. त्याचप्रमाणे आपले विचार रोज एका डायरीमध्ये लिहून ठेवत चला. प्रचंड इच्छाशक्ती, जिद्द व मेहनत करण्याची तयारी असेल तर कोणत्याही क्षेत्रात यश प्राप्त होणारच, असे प्रतिपादन सक्सेस फॅक्टरी या पुस्तकाचे लेखक विशाल पाटील यांनी केले.
गिरणा गौरव प्रतिष्ठान आयोजित पुस्तकावर बोलू काही या कार्यक्रमात पाटील बोलत होते. कार्यक्रमाच्या अध्यक्षस्थानी लेखक मधुकर गिरी होते. ज्येष्ठ्य साहित्यिक सुहास टिपरे यांनी सूत्रसंचालन केलें. डॉ. प्रशांत आमरे यांना पुस्तक भेट देण्यात आले. कवियत्री सुनंदा पाटील यांनी आभार मानले.
पाटील म्हणाले की, आपण स्वप्न बघतो व ते पूर्ण करण्यासाठी मेहनत करतो, त्यावेळी आपल्याला नक्की दिशा सापडत नसते व मेहनत वाया जाते. असे का होते? आपल्याकडे वेळेला मर्यादा आहे, तसेच शारीरिक श्रम व बौद्धिक क्षमतेलाही मर्यादा आहे. आपण अनेक छोट्या छोट्या कामावर उगाच आपले श्रम वाया घालवत असतो. अशी निरर्थक कामे बाजूला सारा व आपल्या ध्येयावर लक्ष केंद्रित करा. आपल्या आजूबाजूला यशस्वी व्यक्तींशी संपर्क करून त्यांच्या सान्निध्यात राहून त्यांच्या यशाचे रहस्य काय आहे? याचा अभ्यास करा, असेही पाटील यांनी सांगितले.
—
