नाशिक : प्रतिनिधी
चांदवड येथील एसएनजेबी अभियांत्रिकी व वैद्यकीय महाविद्यालयाचे योग प्रशिक्षक राहुल (अंबादास) भिलाजी येवला यांना त्यांच्या योग क्षेत्रातील मोलाच्या योगदानाबद्दल योगरत्न पुरस्कार प्रदान करण्यात आला. हा गौरव २२ जून रोजी रविवारी, छत्रपती संभाजीनगर येथील यशवंतराव चव्हाण नाट्यगृहात समारंभात करण्यात आला.
हा पुरस्कार आयुष इंटरनॅशनल मेडिकल असोसिएशन, एजीएमए, तसेच राष्ट्रवादी काँग्रेस पार्टी (अजितदादा पवार गट) यांच्या डॉक्टर सेल-आयुष विभाग यांच्या संयुक्त विद्यमाने प्रदान करण्यात आला. कार्यक्रमाचे अध्यक्ष आणि उद्घाटक शिक्षण सम्राट डॉ. बाळासाहेब पवार (प्रदेश अध्यक्ष, राष्ट्रवादी काँग्रेस डॉक्टर सेल) यांच्या हस्ते राहुल येवला यांना या पुरस्कारांचे सन्मानित करण्यात आले.
यावेळी कार्यक्रमात प्रमुख पाहुणे म्हणून उद्योजक मनोज दांडगे, तसेच डॉ. नितीन राजे पाटील (व्हाइस चेअरमन – आयुष इंटरनॅशनल मेडिकल असोसिएशन आणि प्रदेश कार्याध्यक्ष-आयुष विभाग), डॉ. सतीश कराळे (चेअरमन, आयुष इंटरनॅशनल मेडिकल असोसिएशन), डॉ. बाबुराव कानडे (अध्यक्ष, आयुष इंटरनॅशनल मेडिकल असोसिएशन) हे उपस्थित होते.
त्याचबरोबर दिशा चव्हाण, प्रा. कुणाल महाजन, प्रशांत सावंत, मनोहर कानडे यांच्यासह अनेक मान्यवर व पदाधिकारी मंडळींची उपस्थिती लाभली होती. राज्यभरातील अनेक नामांकित योग प्रशिक्षक आणि योग थेरपीस्ट्स देखील मोठ्या संख्येने या सोहळ्यास उपस्थित होते.
राहुल येवला हे योगदर्शन फाउंडेशनचे अध्यक्ष असून योग विद्या धाम, चांदवडचे केंद्र प्रमुख आहेत. तसेच ते महाराष्ट्र योगशिक्षक संघाचे राज्य उपाध्यक्ष व योगक्रीडा समिती प्रमुख, महाराष्ट्र योगासन स्पोर्ट्स असोसिएशनचे राज्य योग क्रीडा स्पर्धा परीक्षक, नाशिक जिल्हा योगासन सोपोर्ट्स असोसिएशनचे संघटन सचिव आणि इंटरनॅशनल नॅचरोपॅथी असोसिएशन नाशिक जिल्हा उपाध्यक्ष अशा विविध संघटनांमध्ये पदाधिकारी म्हणून कार्यरत आहेत.
राहुल बी. येवला यांच्या कार्याची दखल घेत योगरत्न सारख्या प्रतिष्ठेच्या पुरस्काराने त्यांना गौरविण्यात आले. त्यांच्या कार्याने स्थानिक पातळीपासून राज्य पातळीपर्यंत योगप्रसारात मोलाची भर घातली आहे. त्यांच्या या सन्मानाबद्दल सर्व स्तरातून त्यांचे अभिनंदन करण्यात येत असून शुभेच्छांचा वर्षाव होत आहे.
—
