नाशिक : प्रतिनिधी
जिल्हा क्रीडा कार्यालय, नाशिक यांच्यावतीने परमानंद स्पोर्ट्स अकॅडमी, बडदेनगर, नाशिक येथे १५ डिसेंबरला आयोजित स्केटिंग स्पर्धेत सेंट लॉरेन्स हायस्कूल व ज्युनिअर कॉलेजच्या विद्यार्थिनींनी उल्लेखनीय यश संपादन केले आहे.
या स्पर्धेत आराध्या शर्मा (इयत्ता ७ वी, वयोगट १२ ते १४ वर्षे), तसेच अभिश्री माळी (इयत्ता ६ वी, वयोगट १० ते १२ वर्षे) या विद्यार्थिनींची राष्ट्रीयस्तरावरील स्पर्धेसाठी निवड झाली आहे.
निवड झालेल्या या विद्यार्थिनींना पुढील राष्ट्रीय स्पर्धेसाठी नागपूर येथे सहभाग घेण्यासाठी जायचे असून ही स्पर्धा जानेवारीच्या शेवटच्या आठवड्यात किंवा फेब्रुवारीच्या पहिल्या आठवड्यात होणार आहे.
या उल्लेखनीय यशाबद्दल शाळेच्या व्यवस्थापनाकडून दोन्ही विद्यार्थिनींचे अभिनंदन करण्यात आले असून त्यांच्या पुढील क्रीडा वाटचालीसाठी शुभेच्छांचा वर्षाव करण्यात आला आहे. त्यांच्या यशामुळे शाळेचा नावलौकिक वाढला असल्याची भावना यावेळी व्यक्त करण्यात आली.
—
