नाशिक: प्रतिनिधी
दिंडोरी रोडवरील पंचवटी येथील मायको हॉस्पिटलमध्ये शुक्रवारी (दि. २७ फेब्रुवारी) ‘संपूर्ण सुरक्षा केंद्रा’च्यावतीने एक दिवसीय प्रशिक्षण शिबिराचे यशस्वी आयोजन करण्यात आले. अंगणवाडी सेविका, आशा वर्कर, आरोग्य विभागातील कर्मचारी आणि विविध सामाजिक संस्थांच्या (एनजीओ) प्रतिनिधींसाठी आयोजित केलेल्या या शिबिरात आरोग्यविषयक महत्त्वाच्या कायद्यांवर आणि आगामी उपक्रमांवर सविस्तर चर्चा करण्यात आली.
या प्रशिक्षण कार्यक्रमाच्या अध्यक्षस्थानी नगरसेवक हेमंत (अण्णा) शेट्टी उपस्थित होते. तसेच प्रमुख पाहुणे म्हणून नगरसेविका सरिता सोनवणे, नीलम पाटील, चंद्रकला धुमाळ यांच्यासह शंकर हिरे, युवराज सोनवणे, दिगंबर धुमाळ आणि मायको हॉस्पिटलचे वैद्यकीय अधिकारी डॉ. सुबोध शेवाळे, डॉ. योगिता लोखंडे, डॉ. दराडे उपस्थित होत्या.
कार्यक्रमात मार्गदर्शन करताना संपूर्ण सुरक्षा केंद्राच्या व्यवस्थापक वैष्णवी पाटील यांनी केंद्राच्या कार्याची सविस्तर माहिती दिली. जिल्हा कार्यक्रम अधिकारी योगेश परदेशी यांनी एचआयव्ही/एड्स बाबत उपस्थितांना मार्गदर्शन केले. जिल्हा पर्यवेक्षिका सुनीता हिरे यांनी ‘भेदभाव आणि एचआयव्ही/एड्स प्रतिबंध कायदा २०१७’ याविषयी कायदेशीर माहिती दिली. बिटको रुग्णालयाच्या गुप्तरोग विभागाच्या समुपदेशक तथा एसएसके काउंसलर अनिता गोरे यांनी गुप्तरोग आणि त्यावरील प्रतिबंधात्मक उपाय यावर प्रबोधन केले.
मेगा शिबिराचे नियोजन
आगामी १० मार्च रोजी होणाऱ्या ‘मेगा शिबिरा’च्या पूर्वतयारीचा या बैठकीत विशेष आढावा घेण्यात आला. परिसरातील जास्तीत जास्त लाभार्थ्यांना शिबिरस्थळी आणण्यासाठी आशा सेविकांना मार्गदर्शक सूचना देण्यात आल्या. याप्रसंगी बोलताना शंकर हिरे यांनी या मेगा शिबिरास सर्वांच्या वतीने सर्वतोपरी सहकार्य करण्याचे आश्वासन दिले.
इंदिरा गांधी रुग्णालयाचे आयसीटीसी समुपदेशक अरविंद शिरसागर यांनी सूत्रसंचालन केले. यावेळी प्रयोगशाळा तंत्रज्ञ मनीषा पाटील, मायको सातपूरच्या समुपदेशक अश्विनी भोसले, प्रयोगशाळा तंत्रज्ञ हेमांगिनी जोशी, विजय इंदवे, एम अँड ई ऑफिसर योगिता खंडागळे, पंचवटी टीबी युनिटचे वरिष्ठ उपचार पर्यवेक्षक तुषार जावळे, टीबी एचव्ही जोपळे यांच्यासह विविध सामाजिक संस्थांचे कर्मचारी मोठ्या संख्येने उपस्थित होते.
—
